Бременост со висок крвен притисок
Високиот крвен притисок некогаш е присутен пред, во други случаи тој се јавува во тек на бременоста.
• Гестациска хипертензија - се јавува по 20. недела од бременоста. Трудницата нема зголемена концентрација на протеини во урината или други знаци на оштетување на органите, иако во екстремни случаи може да премине во потешки форми.
• Хронична хипертензија- се јавува пред бременост или пред 20. гестациска недела. Но, бидејќи високиот крвен притисок најчесто се јавува без симптоми, многу е тешко да се одреди кога точно се појавил.
• Прееклампсија – Најсериозна компликација на хипертензијата во бременост без разлика на етиологијата е прееклампсијата. Хроничната и гестациската хипертензија може да доведат до преекламсија која се карактеризира со компликации во бременоста како висок крвен притисок и знаци на оштетување на други органи - обично по 20. недела од бременоста. Претходно преекламсијата се дијагностицираше само доколку трудницата има висок притисок и протеини во урина. Денеска се знае дека трудницата може да има преекламсија, иако нема зголемено ниво на протеини во урината.
Компликации од висок крвен притисок
Високиот крвен притисок, а посебно најтешката форма – прееклампсија може да доведе до повеќе компликации во бременоста вклучувајќи:
• Намален протокот на крв во плацентата. Ако плацентата не добива доволно крв, вашето бебе ќе добива помалку кислород и хранливи материи. Ова може да доведе до намален раст на плодот, ниска родилна тежина или предвремено породување.
• Абрупција на плацентата. Прееклампсијата го зголемува ризикот од абрупција на плацентата, каде плацентата пред породувањето се одвојува од внатрешниот ѕид на матката. Абрупцијата може да предизвика тешко крвавење и оштетување на плацентата, состојби кои се опасни по животот на мајката и на бебето.
• Предвремено породување. Понекогаш предвременото породување е опција за да се спречат компликациите опасни по животот на мајката и бебето.
• Ризик од кардиоваскуларни болести. Преекламсијата во иднина го зголемува ризикот од кардиоваскуларни болести кај мајката. Ризикот е поголем доколку сте имале преекламсија повеќе од еднаш или сте имале предвремено породување.
Како се третира и дали е безбедно да се пијат лекови за висок крвен притисок во текот на бременоста?
Иако одреден број лекови за крвен притисок може да влијаат на вашето бебе, постојат лекови кои се безбедни во текот на бременоста. Златен стандард за третирање на хипертензијата во тек на бременоста е Metil Dopa , кој е доста добар поради широкиот спектар на дозирање. Во исклучителни и потешки состојби може да се употребуваат и посилни антихипертензиви.
Третманот е исклучително важен за да се избегнат ризиците од срцев и мозочен удар во текот на бременоста како последица на висок крвен притисок. Последиците за плодот, исто така, се многубројни – од намалена телесна тежина па до смрт.
Доколку треба да пиете лекови во текот на бременоста, вашиот лекар ќе ви препише терапија која ќе биде безбедна за вас и за вашето бебе. Лековите земајте ги како што ви се препишани.
Породување
Начинот на породување при некомплицирана хипертензија не зависи од истата, породувањето зависи од другите индикации. Сепак, вашиот гинеколог може да ви предложи породување неколку дена пред крајниот рок со цел да се избегнат компликации. Доколку се развие прееклампсија и други компликации, потребно е да се породите предвреме. При тешка прееклампсија завршување на бременоста може да биде единствениот избор .
Дали ќе можам да го дојам моето бебе?
Жените со висок крвен притисок се охрабруваат да дојат и покрај тоа што се на терапија.
За доење се охрабруваат повеќето жени кои имаат висок крвен притисок, дури и оние кои земаат лекови. Со вашиот лекар ќе се консултирате дали треба прилагодување на терапијата при доењето.
